Dienstag, 31. Januar 2012

Lang...

...ja sehr lang isch es här sit mim letschte Itrag.
Es isch sehr sehr viel gloffe bi eus, hätt e hufe Sache gha zum zeige, aber mir isch irgendwie Ziit dervo grännt...
So und jetzt möcht i wieder e chli meh inestelle...
Bi immer wieder go luege, uf eurnä Blogs dir machet e so wunderschöni Sache.
Es gluschtet mi immer wieder.
Jo bi jo die ganzi Ziit nit unkreativ gsi, han immer öppis bastlet oder ebe gstrickt.
Ich start min 1. Itrag i däm Johr mit:
... "Spüli"...
I bi inspiriert worde uf verschiedene Blog's, und denn bin i in Wullelade gange, und d'Frau vo dört het mir gseit, sie heigi allne ihrnä Fründine uf Wiehnachte e so Spüli und Migrofaser-Tüecher gstrickt. Jo und bi eus isch gestert en Geburi in der Familie gsi und denn sind mir die "Lümpe"grad glägä cho...
Und es so händ mir's verschänkt, je 1 Lumpe, e Handcreme und e Seife...
d'Aleitig:
Spüli:
43 Maschen aschlo, und fast 1 Chlungele verstricke, e räste lo si zum ei rundi festi Masche häckeln. In der letschte Rundi bim abkette, 3 x 1 Masche lo gheie (jedi 10 Masche), und denn gits jo es grosses Loch und dört strickt me 3 M asche vo mer vorzue wieder abnimmt.
und d'Microfasertücher han i e so gstrickt:
3 Maschen aschlo und denn immer am ändi vo der Nodle die letschti Masche verdopple, e so lang bis der Lumpe die gwünschti Breiti het, denn 2 Nadeln ohni ufneh und au ohni abneh gstrickt, danach in jedere Nodle 2 rechts zäme gstrickt bis wieder 3 Masche uf der Nodle sind.
Am Schluss han i au no e rundi festi Masche ghöglet und no e Ufhänklig dra ghöglet.
Beid Lümpe sind in Rippli gstrickt worde.
So i hoff, dir händs verstande, sunscht dörfet Dir mich jederzit afroge...